شبابنا بخير؟.. جداً الحمدلله وفيه مليون دليل على كده.. منهم التصرف اللي عمله "محمود وليد"..
"محمود" شاب مصري في العشرينات من عمره كان ماشي بالصدفة في شوارع فيصل فلقى محفظة واقعة على الأرض ولما فتحها لقى فيها عملات أجنبية ما بين الدرهم الإماراتي والدولار الأمريكي وبطاقة هوية تخص مواطن إماراتي الجنسية!..
"محمود" أخد الإسم اللي في بطاقة الهوية وبدأ من خلال معارفه يدور عليه في شركة من شركات الاتصالات والحمدلله قدر يلاقي رقم لصاحب الاسم اللي في البطاقة اتصل بيه وطلع صاحب المحفظة فعلاً وقابله وسلمهاله!.. عملية أخدت كام ساعة بس بتأكد على شهامة وجدعنة "محمود" وأخلاق المصريين عموماً..
بيقول "محمود" في حوار مع الصحفية "عبير خالد": (صممت إن المحفظة لازم ترجع لصاحبها، أنا أكبر إخواتي ولازم أكون قدوة ليهم ولكل اللي يشوفني)..
المصريين عنوان لكل حاجة مُلهمة، وأخلاقنا الجميلة جزء لا يتجزأ من شخصيتنا.
#بالعامية_المصرية
